Thursday, 20 September 2012

Kima Hringnun



    By: Lalthapuia Sailo
                                                        
               
                Ni chu thlanglamah a liam dawn suar suar tawh a. Chu ni tla tur chuan khua leh a chhehvela thingkung leh ram ngawte chu mawi em em mai hian a chhun eng raih mai a. Savate chu nuam tih hmel tak hian an lo hram kalh kalh a, an hlim hle a ni tih hai rual a ni lo. Hemi tlai hi kum hlui thlah tlai , Pawltlak thlaa ni hnuhnung ber a ni kher bawk nen khaw chhunga nula leh tlangvalte hlei hleiin nuam an ti a, naupangho tualchai vel pawhin tudang an ngai lo tih ralkhat atang pawhin hai rual a ni lo. Upa lam deuhte erawh chuan an nun hlui leh an vanglai ni te an chhui kir a ni ang tih tur hian zawi te te hian ti ti an lo sep ve bawk a. Hmun thenkhatah chuan thianho leh chhungkhat laina hnai deuh chaw eikhawm thawm te pawh hriat tur a awm. Chu ni tla tur meuh chuan chu khua leh a chhehvela thil nung tinrengte tan ‘bik’ hliah hliahna lai tak a nei a ni chek zawng a ni.

                 Chu khua leh a chhehvela chutianga boruak a inlumlet vel mek lai chuan tlangval pakhat Hmangaihkima tan erawh zawng chu tlai chuan pawimawhna a nei teh chiam pawhin a lang lo. A tan chuan tlai dang ang bawka lungngaihnain a tuam vel tlai tho a ni a, a danglam teh chiam vak chuang lo. Chu tlangval Kima an tih mai thin chuan dan pangngai angin an khaw chhim lam daia an khaw thlanmual chu a pan leh hna hna a. Chu hmun khawhar tak chuan a rilru hah zualpui chu tlem azawng a tikiang deuha a hriat thin vang a ni. Chu tlangval chu beidawnnain a man chauh pawh nilova, a hneh a, a phuar hlawm tak a nih avangin a hmelah enna chhete pawh a pu miah tawh lo. Rei vak lo a kal hnu chuan thlanmual hmun chu a zuk thleng ta hlawl mai a. Chu thlanmuala thlan tam tak zingah chuan a lo tlawh fo tawh thin leh a ngainat em em thin thlan pakhatah chuan thuthmun a rem leh chat a. Chu thlan chul tawh tak chu a mah hmangaih em em tu leh a hringtu nu thlan a ni. A nu hian Vanduaithlak tak maiin kum 10 mi lek a la nih laiin, nat lawkna em em pawh nei lovin a boralsan thut kha a ni a! A nu boral hun lai hian naupang mai a la nih avangin a nu hlutzia a lo ngaituah pha lo. Mahse a nu boral tak atanga a lo fahrah tak em em mai leh nun beidawnna in a man tak hnu hian a nu thlan chu a tana rohlu ber a ni tih a hrechhuak ve ta chauh a ni.


              Hmangaihkima hi khawlaifa ‘sawn’ an tih ang hi a ni a. A pi leh pute hian a nu chauh hi fa an neih avangin, a pi leh pute leh a nu an han boral tak hnu hian chhungkhat laina sawi tur mumal a nei ta lo a ni. A pa hi an khuaa an kohhran Upa leh an kohhran ban pawimawh tak pakhat a ni a, nupui dang neiin fa pawh pathum lai a nei leh nghe nghe a. Mahse ‘a hmuh theih a fapa hmangaihna chhete pawh nei lova, a hmuh theih loh Pathian hmangaih tum tlat’ mihring a ni a. A pa berin a ngaihsak duh miah loh avang hian a pa unaute leh lainate pawhin an ngaihsak ngam lo a ni. Amahin a pi leh pute in leh lo dinah chuan a khawsa chho ve nawk nawk a, a retheih em avang chuan a zak ngawih ngawih thin. Then leh rualte a kawm ngai meuh lova, khawtlanga puipun nikhuate pawhin a tel ve ngam ngai lo. A naupan lai atang tawha mite kamchhe theuhna a nih thin avangin, a rilru pawh thui fe chu a piangsual zo tawh a. Mite aia hnuaihnung ngawih ngawih leh mite bula awm ve pha lovah a inngai nghet ta bur mai a ni.

             A nu thlan chul tawh taka thu chung chuan a nuin a dampui hunlaite a ngaihtuah neuh neuh a. Chung hun te chu kum tam liam tawh a mi kha ni tawh mah se, a tan chuan nimina thil thleng ang mai a la ni. Lehkha a zir laia, an pawla a thiamthei ber a nih dan te, a nuin a hmangaih thin dan zawng zawng te leh a pi leh puten keh thei dawma ,an dawm thin dan zawng zawng te an ngaihtuah kir leh chuan a biangah dan rual lohin mittui a lo luang zawih zawih mai a. A pi leh pute leh a nu kha chuan la dampui ve sela chuanin hetiang hi chuan a awm bik tawp lo tur tih a ngaihtuah thlen phei chuan insum thei chi rual a ni ta lo. A nu thlan chu kuah ngawih ngawih chungin a awrawl tawp chuan a tap ta hawm hawm mai a.

              Kima hi zawng he mihring tungchhoa kal zingah hian a vanduai chungchuang ve zawng a ni. Rethei leh mi hmuhsit reng rengin a seiliana, tumah ka ui ka ar titu lah a hmu hek lo. Mak tak main a tleirawl chhuah hlim khan an khuaa khawsathei pawl ni ve phak hial Pu Siamkunga fanu Zonunmawii, a kum rualpui awm vel hian a ngaizawng ve tlat mai a. Kima hi tlangval hmelchhe lo tak a nih ve tlat avangin, a hmel tha a tih vanga Zonunmawii hian lo ngaizawng a nih pawhin thil mak vak a ni bik awm lo ve. Mahse a nula chhungten chu thu chu an hriat rual rualin, a ngaizawng hmasatu pawh ni miah lo Kima chu kutthlak meuhin an vau a, hmusit tak maiin an ankhum hrep mai zuk nia! Tin, Zonunmawii chu khawpui lamah dah bo nghalin, pasal an neih luih tir ta daih nghe nghe a ni. Heng a thil tawn avang hian a hnu lamah zel pawh Kima hian nulat tlangval inhmangaihna reng reng hi a ngaihtuahzui duh ta miah lo mai nilovin a huatin a hua hluah hluah mai a ni.

            Chutianga mi zawng zawngin hnuchawn tlata a inhriat tak avang chuan mi hmel eng reng reng zahna a lo neih phah ta a. Mi zinga awm aiin amah chauha a in lian lo te maia awm keuh keuh chu nuam zawkin a hre ta hial a. Chu chuan thil chin tha lo tak a chin tir ta nghe nghe a ni. A tana harhfima khawvel hman a ngam awm lova a hriat tak avangin zu leh damdawi ruih zeuh zeuh a lo chin phah ta a.Mahse a rilru hahna atanga chawktu tura a ngaih ruihhlo chuan a rilru hah a ti zual ting mai si. A hriat loh karin a ngawl a lo vei hman der mai leh ta nghal a, a tihngaihna tak pawh a hre ta lo. A vanduaina tizualtu mai a lo ni.

             Chu kumhlui ni tla tur a liam tep tawh lai chuan Kima chuan a nun hlui liam tawh hnute chu a chhui kir nauh nauh a, lungawi har a ti tak zet a ni. A pa, Pathian Kohhran thianghlima Kohhran Upa ve meuh pawhin a thisen zawmpui a fapa ngei mai pawh a hmangaih thei lo a nih si chuan, a pa in a rawng a bawl thin Pathian meuh pawhin a hmangaih theiin a ring thei tawh tlat lo. Nghilh deuh duk hian a inhria a, a hmelah chuan lungngai ngawih ngawih hmel a lo lang a. Hmangaihkima chu hmangaihtu nei lo ni tlatin a inhre thar leh ta….
       
              A rilru hah zualpui atanga chhawktu ni a ngaiin a kekawr ipte veilama a ah damdawi mum thenkhat chu tui ti lo chung chung chuan an hmawm lui leh ta tawn tawn a. Mahse chu pawh chuan a rilru beidawnna ata , chawk zangkhai zo chuangin a hre lo.

                  Chu ni tla tur eng suar suar chuan, a hringnun chu tlakpui ve law law ta mai sela a duh ta hial a……

Kindly Bookmark this Post using your favorite Bookmarking service:
Technorati Digg This Stumble Stumble Facebook Twitter
YOUR ADSENSE CODE GOES HERE

0 comments:

Post a Comment

 

Recent Posts

Recent Comments

| Zampuitlang © 2009. All Rights Reserved | Template Style by My Blogger Tricks .com | Design by REMA RALTE | Back To Top |